ఆంధ్ర ప్రదేశ్
ఓయ్-కొరివి జయకుమార్
ఆంధ్రప్రదేశ్ రాష్ట్ర విద్యాశాఖ 10వ తరగతి ఫలితాలను విడుదల చేసిన సంగతి తెలిసిందే. ఇందులో భాగంగా రాష్ట్రవ్యాప్తంగా మొత్తం ఉత్తీర్ణత శాతం పెరగడం స్వాగతించదగ్గ పరిణామం. గతేడాదితో పోలిస్తే ఈసారి విద్యార్థుల పనితీరు మెరుగుపడిందని, ముఖ్యంగా గ్రామీణ విద్యార్థులు, బాలికలు తమ ఆధిపత్యాన్ని చాటుకున్నారని గణాంకాలు స్పష్టం చేస్తున్నాయి. అయితే అందరినీ ఆశ్చర్యపరిచే విధంగా కొన్ని పాఠశాలలు చెత్త ఫలితాలు నమోదు చేశాయి.
మొత్తంగా 85.25% ఉత్తీర్ణతతో, బాలికలు 87.90%తో బాలుర కంటే మెరుగైన ప్రతిభ కనబరిచారు. ప్రభుత్వ పాఠశాలల్లో ఉత్తీర్ణత శాతం 78.39 శాతానికి పెరిగింది. పార్వతీపురం మన్యం జిల్లాల్లో అత్యధికంగా 96.07 శాతం ఉత్తీర్ణత నమోదైంది. అల్లూరు సీతారామరాజు జిల్లా అత్యల్పంగా 57.02 శాతం ఉత్తీర్ణత సాధించింది. రాష్ట్రంలోని 2161 పాఠశాలల్లో 100 శాతం ఉత్తీర్ణత నమోదైంది. ఈ పరీక్షల్లో ఫెయిల్ అయిన విద్యార్థులకు 25 నుంచి జూన్ 4 వరకు సప్లిమెంటరీ పరీక్షలు నిర్వహించనున్నారు. ప్రభుత్వం చేపట్టిన విద్యా సంస్కరణలు, ప్రత్యేక తరగతుల నిర్వహణే ఈ విజయానికి ప్రధాన కారణమని విశ్లేషకులు భావిస్తున్నారు.
మరోవైపు 16 పాఠశాలల్లో సున్నా శాతం ఉత్తీర్ణత నమోదైంది. ఈ పాఠశాలల్లో ఒక్క విద్యార్థి కూడా కనీస మార్కులతో ఉత్తీర్ణత సాధించకపోవడం విద్యాశాఖను కలవరపెడుతోంది. మరీ ముఖ్యంగా ఈ 16 పాఠశాలల్లో 11 ప్రైవేట్ పాఠశాలలు ఉండడం సంచలనంగా మారింది. భారీగా ఫీజులు వసూలు చేస్తున్న ప్రయివేటు యాజమాన్యాలు బోధనపై కనీస శ్రద్ధ చూపడం లేదని విమర్శించారు. మిగిలిన వాటిలో రెండు ఆశ్రమ పాఠశాలలు, రెండు ఎయిడెడ్, ఒక ప్రభుత్వ పాఠశాల ఉన్నాయి.
ఫెయిల్ అయిన విద్యార్థులు నిరాశ చెందవద్దని, ఈ లోపాలను సరిచేసి తదుపరి పరీక్షల్లో విజయం సాధించాలని విద్యాశాఖ కోరుతోంది. జీరో శాతం ఫలితాలు రాని పాఠశాలల గుర్తింపు రద్దుపై ప్రభుత్వం త్వరలో నిర్ణయం తీసుకుంటుంది లేదా ఆ యాజమాన్యాలపై కఠిన చర్యలు తీసుకుంటుంది. టెన్ పరీక్షల్లో ఉత్తీర్ణులైన విద్యార్థులందరినీ మంత్రి నారా లోకేష్ అభినందించారు. ఈ సారి పాస్ కాలేకపోయిన వారు నిరుత్సాహపడకండి.. కుటుంబాలు, ఉపాధ్యాయులు, సమాజం మద్దతుతో మీరు మరింత బలంగా తిరిగి రావచ్చు.