భారతదేశం
ఓయ్-చంద్రశేఖర్ రావు
పశ్చిమ బెంగాల్లో అసెంబ్లీ ఎన్నికల పోలింగ్ చివరి దశకు చేరుకుంది. సాయంత్రం 5 గంటల వరకు 89.99 శాతం పోలింగ్ నమోదైంది. మొత్తం 142 నియోజకవర్గాలకు త్వరలో పోలింగ్ ప్రక్రియ ముగియనుంది. బెంగాల్ అంతటా ఉదయం నుండి అనేక చెదురుమదురు సంఘటనలు నమోదయ్యాయి. కొన్ని చోట్ల తృణమూల్ కాంగ్రెస్, బీజేపీ కార్యకర్తలు ఘర్షణకు దిగారు. వారిని చెదరగొట్టేందుకు పోలీసులు, భద్రతా బలగాలు లాఠీచార్జి చేయాల్సి వచ్చింది.
తృణమూల్ కాంగ్రెస్ (టిఎంసి) అధినేత్రి, ముఖ్యమంత్రి మమతా బెనర్జీ కోల్కతాలో ఈరోజు మధ్యాహ్నం 3:30 గంటలకు తన ఓటు హక్కును వినియోగించుకున్నారు. ఈసారి కూడా ఆమె తన కంచుకోట అయిన భవానీపూర్ నుంచి బరిలోకి దిగింది. ఆమె తన సమీప ప్రత్యర్థి బీజేపీకి చెందిన సువేందు అధికారితో తలపడుతున్నారు. 2021లో కూడా ఆమె అదే నియోజకవర్గం నుంచి ఓడిపోయారు. ఇప్పుడు గట్టి పోటీ నెలకొంది.
కోల్కతాలో తన ఓటు హక్కును వినియోగించుకున్న అనంతరం మమతా బెనర్జీ మాట్లాడారు. విజయ చిహ్నాన్ని ప్రదర్శించారు. ఈ ఎన్నికల్లో భారీ విజయం సాధించబోతున్నామని అన్నారు. తృణమూల్ కాంగ్రెస్ గెలుస్తుందని ధీమా వ్యక్తం చేశారు. ఇప్పటివరకు అందిన సమాచారం ప్రకారం బెంగాల్లో బీజేపీ ఓడిపోతోంది. మూడొంతుల మెజారిటీతో ప్రభుత్వాన్ని ఏర్పాటు చేస్తామని ఆమె స్పష్టం చేశారు.
ఈ సందర్భంగా కేంద్ర బలగాలపై మమతా బెనర్జీ తీవ్ర ఆరోపణలు చేశారు. సీఆర్పీఎఫ్, కేంద్ర పరిశీలకులు మహిళలు, చిన్నారులతో సహా ప్రజలను కొట్టి పోలింగ్ కేంద్రాలకు రాకుండా అడ్డుకుంటున్నారని విమర్శించారు. పోలింగ్కు ముందు రోజు రాత్రి నుంచి అనేక దారుణాలు జరిగాయని, తమ పార్టీకి చెందిన పలువురు సానుభూతిపరులను అదుపులోకి తీసుకున్నారని ఆమె ఆవేదన వ్యక్తం చేశారు. దీన్ని కోర్టు ధిక్కారంగా అభివర్ణించారు.
ఇలాంటి నిర్బంధ ప్రజాస్వామ్యాన్ని తానెప్పుడూ చూడలేదని మమత దుయ్యబట్టారు. ఏ బూత్లోనూ రాష్ట్ర పోలీసులు లేరని, అంతటా సెంట్రల్ రిజర్వ్ పోలీసు బలగాలు ఆధిపత్యం చెలాయిస్తున్నాయని ఆమె ఆరోపించారు. సరిహద్దుల రక్షణకు బదులు రాజకీయ పార్టీకి కేంద్ర బలగాలు భద్రత కల్పిస్తున్నాయని దీదీ విమర్శించారు. తాను 1984 నుంచి ఎన్నికల్లో పోటీ చేస్తున్నానని, పోలింగ్ సమయంలో ఇంత భయానక వాతావరణం ఎప్పుడూ చూడలేదన్నారు.