తెలంగాణ
ఓయ్-బొమ్మ శివకుమార్
పశ్చిమాసియాలో ఉద్రిక్తతలు తగ్గడం లేదు. 40 రోజులకు పైగా ఇరాన్-అమెరికా-ఇజ్రాయెల్పై దాడులు కొనసాగుతున్నాయి. దాడుల కారణంగా ఇరాన్ హార్ముజ్ జలసంధిని మూసివేసింది. ప్రపంచ దేశాలు ఇంధన సంక్షోభంలో కూరుకుపోయాయి. భారత్లోనూ పెట్రోల్, గ్యాస్ సిలిండర్ల కొరత ఏర్పడిన సంగతి తెలిసిందే. భారత్లో టోకు ద్రవ్యోల్బణం భారీగా పెరిగింది. 2026 మార్చిలో 3.88 శాతం పెరిగింది. ఫిబ్రవరిలో 2.13 శాతంగా ఉన్న ద్రవ్యోల్బణం మార్చిలో 3.88 శాతానికి చేరుకుంది. పశ్చిమాసియాలో ఉద్రిక్తతలు ముడి చమురు మరియు గ్యాస్ కొరతకు దారితీశాయి. ఈ కారణంగానే టోకు ద్రవ్యోల్బణంలో ఈ మార్పులు వచ్చినట్లు తెలుస్తోంది.
గత నెలలో 2.3 శాతంగా ఉన్న ద్రవ్యోల్బణం మార్చి నాటికి 3.88 శాతానికి చేరుకోవడం ఆందోళన కలిగించే అంశం. గత మూడేళ్లలో ఇదే అత్యధికమని నిపుణులు చెబుతున్నారు. అంతర్జాతీయ మార్కెట్లో ముడిచమురు, సహజవాయువు ధరలు పెరగడం వల్లే టోకు ద్రవ్యోల్బణం పెరిగిందని స్పష్టం చేశారు. అలాగే ఆహారేతర వస్తువులు, ఖనిజాల ధరలు కూడా పెరిగాయి. వీటితో పాటు మెటల్స్, టెక్స్టైల్స్ తదితర రంగాల్లో కూడా ద్రవ్యోల్బణం పెరిగింది. 3.39 శాతానికి చేరింది. అయితే, టోకు ద్రవ్యోల్బణం పెరిగినప్పటికీ, ఆహార ధరలలో స్వల్ప తగ్గుదల కనిపించింది.
మార్చి నెలలో జాతీయ స్థాయిలో సగటు ద్రవ్యోల్బణం 3.40 శాతంగా నమోదైంది. అయితే యాభై లక్షలకు పైగా జనాభా ఉన్న రాష్ట్రాల్లో తెలంగాణ 5.83 శాతంతో మొదటి స్థానంలో నిలిచింది.
4.05 శాతంతో ఆంధ్రప్రదేశ్ రెండో స్థానంలో నిలవడం గమనార్హం. ఈ రాష్ట్రాల తర్వాత వరుసగా 3.96 శాతంతో కర్ణాటక, 3.77 శాతంతో తమిళనాడు, 3.64 శాతంతో రాజస్థాన్ ఉన్నాయి. తెలంగాణలో గ్రామీణ ప్రాంతాల్లో 6.64 శాతం, పట్టణ ప్రాంతాల్లో 5.24 శాతంగా ద్రవ్యోల్బణం నమోదైందని గణాంకాలు చెబుతున్నాయి. అలాగే ఫిబ్రవరితో పోలిస్తే మార్చిలో మొత్తం ద్రవ్యోల్బణం 0.19 శాతం పెరిగింది. ఆహార సంబంధిత ద్రవ్యోల్బణం 0.4 శాతం పెరిగింది.