తెలంగాణ
ఓయ్-బొమ్మ శివకుమార్
తెలంగాణ మంత్రివర్గ సమావేశం కొద్దిసేపటి క్రితం ముగిసింది. ఈ సమావేశంలో రాష్ట్ర మంత్రివర్గం పలు కీలక నిర్ణయాలు తీసుకుంది. సచివాలయంలో సీఎం రేవంత్రెడ్డి అధ్యక్షతన మంత్రివర్గ సమావేశం జరిగింది. ఈ సమావేశంలో ఆర్టీసీ సమ్మెపై కార్మిక సంఘాలతో చర్చలు జరపాలని రాష్ట్ర మంత్రివర్గం నిర్ణయించింది. అలాగే కాళేశ్వరంపై సీబీఐ విచారణకు ఒత్తిడి తేవాలని కేబినెట్ నిర్ణయించింది. సమావేశంలో తీసుకున్న నిర్ణయాలను మంత్రి ఉత్తమ్ కుమార్ రెడ్డి మీడియాకు వివరించారు.
సీఎం రేవంత్రెడ్డి అధ్యక్షతన జరిగిన మంత్రివర్గ సమావేశంలో రాష్ట్ర మంత్రివర్గం కీలక నిర్ణయాలు తీసుకుంది. ఈ విషయాలను మంత్రి ఉత్తమ్ కుమార్ రెడ్డి వివరించారు. మంత్రివర్గ సమావేశంలో కార్మికుల డిమాండ్లు, సమస్యల పరిష్కారంపై చర్చించామని, రేపు కార్మిక సంఘాలతో ఐదుగురు మంత్రులు చర్చిస్తారని మంత్రి ఉత్తమ్ తెలిపారు. నర్సంపేట, నల్గొండ ఘటనలపై మంత్రివర్గం దిగ్భ్రాంతి వ్యక్తం చేసిందని, తొందరపాటు నిర్ణయాలు తీసుకోవద్దని ఆర్టీసీ కార్మికులకు విజ్ఞప్తి చేసినట్లు ముఖ్యమంత్రి రేవంత్ రెడ్డి వివరించారు.
అలాగే మంత్రులు, ఎమ్మెల్యేల జీతాల్లో 50 శాతం రిటైర్డ్ ఉద్యోగులకు ఇవ్వాలని నిర్ణయించినట్లు మంత్రి ఉత్తమ్ కుమార్ రెడ్డి తెలిపారు. పదవీ విరమణ పొందిన ఉద్యోగులకు అందజేసే ప్రయోజనాలలో సుమారు రూ. 6 వేల కోట్లు బకాయిలు ఉన్నాయని తెలిపారు. వీటిని వారికి ఎలా ఇవ్వాలనే దానిపై త్వరలో స్పష్టత రానుంది. అంతే కాకుండా కాళేశ్వరంపై సీబీఐ విచారణకు ఒత్తిడి తేవాలని రాష్ట్ర మంత్రివర్గం నిర్ణయించింది. ఎలా ముందుకు వెళ్లాలనే అంశంపై సబ్ కమిటీని ఏర్పాటు చేశామని మంత్రి ఉత్తమ్ తెలిపారు.
మరోవైపు తెలంగాణ రాష్ట్ర ప్రభుత్వం కీలక నిర్ణయం తీసుకుంది. శ్రీ వాసవీ మాత జయంతిని రాష్ట్ర పండుగగా అధికారికంగా ప్రకటించారు. ఇక నుంచి ప్రతి ఏటా వైశాఖ శుక్ల పక్ష దశమి నాడు రాష్ట్రవ్యాప్తంగా ప్రభుత్వ లాంఛనాలతో ఈ ఉత్సవాలు నిర్వహించనున్నట్లు తెలిపారు. ఈ ఏడాది ఏప్రిల్ 26న వాసవీ జయంతి ఉన్నందున ఆ రోజునే ఉత్సవాలు నిర్వహించాలని ప్రభుత్వం ఉత్తర్వులు జారీ చేసింది. రాష్ట్ర ప్రభుత్వ ఆదేశాల మేరకు రాష్ట్రంలోని అన్ని జిల్లాల కలెక్టర్లు తమ తమ జిల్లాల్లో వాసవీ మాత జయంతి వేడుకలను అధికారికంగా నిర్వహించాలి.