ఆంధ్ర ప్రదేశ్
ఓయ్-సాయి చైతన్య
రైల్వే శాఖ మరో కీలక నిర్ణయం తీసుకుంది. తెలుగు రాష్ట్రాల్లో వందేభారత్ రైళ్లకు ఆదరణ పెరుగుతుండడంతో వాటిని మరింత విస్తరించాలని నిర్ణయించారు. అందులో భాగంగా ప్రస్తుతం విశాఖ నుంచి సికింద్రాబాద్ వరకు నడుస్తున్న వందే భారత్కు మరో ప్రధాన స్టేషన్లో హాల్టింగ్ సౌకర్యం కల్పించారు. అదేవిధంగా ప్రస్తుతం ప్రత్యేక రైళ్లుగా నడుస్తున్న తొమ్మిది ఎక్స్ప్రెస్ రైళ్లను సాధారణ రైళ్లుగా మార్చారు. ప్రయాణికుల నుంచి వస్తున్న మద్దతు మేరకు ఈ నిర్ణయాలను అమలు చేసేందుకు సిద్ధమయ్యారు.
సికింద్రాబాద్-విశాఖపట్నం మధ్య నడిచే వందేభారత్ ఎక్స్ప్రెస్ ఇకపై తాడేపల్లి గూడెం రైల్వేస్టేషన్లో ఆగుతుంది. ఈ విషయాన్ని కేంద్ర మంత్రి భూపతిరాజు వెల్లడించారు. స్థానికుల నుంచి వచ్చిన వినతులను భూపతిరాజు రైల్వే శాఖ దృష్టికి తీసుకెళ్లగా.. ఈ మేరకు రైల్వే శాఖ సానుకూలంగా స్పందించింది. దీంతో తాడేపల్లిగూడెం పరిసర ప్రాంతాల ప్రజలకు వందే భారత్ సౌకర్యం అందుబాటులోకి రానుంది. తాడేపల్లిగూడెంకు వందే భారత్ చేరుకునే సమయాన్ని రైల్వే శాఖ అధికారికంగా ప్రకటించనుంది. అదే విధంగా రైల్వేకు సంబంధించిన కీలక అంశాలను మంత్రి భూపతిరాజు వెల్లడించారు. గతంలో ఉన్న 9 ప్రత్యేక రైళ్లను ఇప్పుడు సాధారణ సర్వీసులుగా మార్చినట్లు ప్రకటించారు. సికింద్రాబాద్ – అనకపల్లి (17043/44), చర్లపల్లి – భువనేశ్వర్ న్యూ ఎక్స్ప్రెస్ (17067/68) రైళ్లు ఆకివీడు, భీమవరం టౌన్, తణుకు స్టేషన్లలో ఆగుతాయి.
సాధారణ ఎక్స్ప్రెస్గా తొమ్మిది ప్రత్యేక రైళ్లు
అదేవిధంగా చర్లపల్లి – అనకాపల్లి (17045/46), చర్లపల్లి – ఎ నాకపల్లి (17053/54), కాకినాడ టౌన్ – హిసార్ ఎక్స్ప్రెస్ (17 295/96) రైళ్లకు తాడేపల్లిగూడెంలో స్టాపింగ్ సౌకర్యం ఉంది. నియోజకవర్గంలోని ఇతర ప్రాంతాల నుండి వచ్చే ప్రయాణికుల కోసం తిరుపతి – నరసాపురం (17427/28) రైలు ఆకివీడు, భీమవరం టౌన్, భీమవరం, పాలకొల్లు మరియు నరసాపురం స్టేషన్లలో ఆగుతుంది. కాకినాడ టౌన్ – లింగంపల్లి (12775/76), కాకినాడ టౌన్ – మైసూర్ ఎక్స్ప్రెస్ (17289/90) రైళ్లు తణుకు, భీమవరం టౌన్ మరియు ఆకివీడులో ఆగుతాయి. చర్లపల్లి – నరసాపురం ఎక్స్ప్రెస్ (17061/62) రైలు ఆకివీడు, భీమవరం టౌన్, వీరవాసరం, పాలకొల్లు, నరసాపురం స్టేషన్లలో ప్రయాణికులకు అందుబాటులో ఉంటుందని మంత్రి శ్రీనివాసవర్మ వివరించారు. జాతీయ రహదారి-165 నిర్మాణ పనులు రెండు దశాబ్దాలుగా పెండింగ్లో ఉన్నాయని, త్వరలోనే ప్రారంభిస్తామని వెల్లడించారు.