ఆంధ్ర ప్రదేశ్
ఓయి-లింగారెడ్డి గజ్జల
ఏడుకొండల వాడి దర్శనానికి వచ్చే భక్తుల సంఖ్య రోజురోజుకు పెరుగుతోంది, గతంలో ఎన్నడూ లేని విధంగా 2025-26 సంవత్సరం అద్భుతంగా నిర్వహించబడింది. పక్కా ప్రణాళిక, అధునాతన సాంకేతికత మేళవించి భక్తుల రద్దీని నియంత్రించి ఆదాయాన్ని పెంచడంలో తిరుమల తిరుపతి దేవస్థానం విజయవంతమైంది.
గత రెండేళ్లలో రోజుకు సగటున 70 వేల మంది భక్తులు దర్శించుకోగా, ఈ ఏడాది ఆ సంఖ్య 73 వేలకు చేరుకుంది. అంటే దాదాపు 4.57 శాతం వృద్ధి. ముఖ్యంగా వైకుంఠ ఏకాదశి వంటి పర్వదినాలలో పది రోజుల వ్యవధిలో గతంతో పోలిస్తే 1.40 లక్షల మంది అదనంగా దర్శనం చేసుకోవడం విశేషం. AI (ఆర్టిఫిషియల్ ఇంటెలిజెన్స్) ఇంటిగ్రేటెడ్ కమాండ్ కంట్రోల్ సెంటర్ ద్వారా క్యూలను నిరంతరం పర్యవేక్షించడం మరియు కంపార్ట్మెంట్ల వేచి ఉండే సమయం ఆధారంగా డైనమిక్ నిర్ణయాలు తీసుకోవడం ద్వారా, సాధారణ భక్తుల దర్శన సమయం గణనీయంగా తగ్గింది.
హుండీ ఆదాయంలో డబ్బుల వర్షం..
సాధారణంగా తిరుమలలో రద్దీ ఎక్కువగా ఉంటే ఒకటి, రెండు నెలలు మాత్రమే హుండీ ఆదాయం రూ.120 కోట్లు దాటుతుంది. కానీ, విచిత్రంగా ఈ ఏడాది ఆరు నెలలకు ప్రతినెలా రూ.120 కోట్లకు పైగా హుండీ ఆదాయం వచ్చింది. ఏడాది మొత్తానికి హుండీ కానుకలు రూ.1420 కోట్లకు పైగా కొత్త రికార్డు సృష్టించాయి. భగవంతునిపై భక్తులకు ఉన్న అచంచల విశ్వాసానికి ఇది నిదర్శనం.
దళారీ వ్యవస్థకు చెక్..వసతిలో పారదర్శకత..
తిరుమలలో గదుల కేటాయింపులో దళారీ వ్యవస్థకు తితిదే చెక్ పెట్టింది. ఆన్లైన్ మరియు ఆఫ్లైన్ రెండింటిలోనూ “దర్శన్ మాత్రమే గది” నియమాన్ని కఠినంగా అమలు చేయడం బ్లాక్ మార్కెట్ రాకెట్ను విచ్ఛిన్నం చేసింది. దీంతో సామాన్య భక్తులకు గదులు త్వరగా అందుబాటులోకి రావడమే కాకుండా వసతి శాఖ ఆదాయం కూడా రూ.133 కోట్ల నుంచి రూ.141 కోట్లకు పెరిగింది.
ఏఐ టెక్నాలజీతో.. మరింత రుచికరమైన లడ్డూ!
తిథి శ్రీవారి లడ్డూ ప్రసాదం నాణ్యతలో విప్లవాత్మక మార్పులు తెచ్చింది. నెయ్యి, ఇతర ముడిసరుకులను గ్రేడింగ్ చేయడంలో ఏఐ టెక్నాలజీని వినియోగించడంతో లడ్డూ రుచి పెరిగిందని భక్తులు సంతోషం వ్యక్తం చేస్తున్నారు. డిమాండ్కు తగ్గట్టుగా ఉత్పత్తిని కూడా పెంచారు. గతేడాది 12.49 కోట్ల లడ్డూలు విక్రయించగా, ఈ ఏడాది 13.95 కోట్లకు (12.68 శాతం వృద్ధి) పెరిగింది. త్వరలో లడ్డూ కౌంటర్లలో యూపీఐ చెల్లింపులను కూడా ప్రవేశపెట్టనున్నారు.
అన్నప్రసాదం.. అక్షయ పాత్రే!
భక్తుల ఆకలి తీర్చేందుకు అన్నప్రసాద వితరణ కూడా కొనసాగుతోంది. మాతృశ్రీ తరిగొండ వెంగమాంబ అన్నప్రసాద భవనం ద్వారా 2023-24లో రోజుకు 1.87 లక్షల మందికి అన్నదానం చేయగా, 2025-26 నాటికి ఆ సంఖ్య 2.85 లక్షలకు చేరుకుంది. భక్తుల రద్దీ పెరిగినా ఎలాంటి లోటు లేకుండా అన్నప్రసాద ట్రస్టుకు విరాళాలు వెల్లువెత్తుతున్నాయి.