ఆంధ్ర ప్రదేశ్
ఓయి-లింగారెడ్డి గజ్జల
పుట్టపర్తిలో ఆంధ్రప్రదేశ్ రక్షణ రంగ చరిత్రలో కొత్త అధ్యాయం ప్రారంభమైంది. ఏరోనాటికల్ డెవలప్మెంట్ ఏజెన్సీ (ఏడీఏ) ఆధ్వర్యంలో ప్రతిష్ఠాత్మకమైన ‘అడ్వాన్స్డ్ మీడియం కంబాట్ ఎయిర్క్రాఫ్ట్’ (ఏఎంసీఏ) ఇంటిగ్రేషన్ ఫ్లైట్ టెస్టింగ్ ప్రాజెక్టుకు కేంద్ర రక్షణ మంత్రి రాజ్నాథ్ సింగ్, ముఖ్యమంత్రి నారా చంద్రబాబు నాయుడు శంకుస్థాపన చేశారు. ఈ సందర్భంగా జరిగిన సభలో సీఎం చంద్రబాబు.. ఏపీని దేశానికి రక్షణ శక్తిగా అభివర్ణించడమే కాకుండా రానున్న రోజుల్లో ‘బంగారం’ ఉత్పత్తిలో రాష్ట్రం కీలక పాత్ర పోషించబోతోందని సంచలన ప్రకటన చేశారు.
ఆంధ్రప్రదేశ్ పారిశ్రామికంగానే కాకుండా సహజ వనరుల వినియోగంలో కూడా ముందుకెళ్తోందని ముఖ్యమంత్రి చంద్రబాబు నాయుడు అన్నారు. గతంలో కేజీఎఫ్ అంటే బంగారం గుర్తుకు వచ్చేదని, ఇప్పుడు జేజీఎఫ్ (జొన్నగిరి గోల్డ్ ఫీల్డ్) గుర్తుకు వస్తుందని విశ్వాసం వ్యక్తం చేశారు. కర్నూలు జిల్లా జొన్నగిరిలో ఈ ఏడాది 600 కిలోల బంగారం ఉత్పత్తి అవుతుందని, రెండో ఏడాదికి 1500 కిలోలకు చేరుకుంటుందని వివరించారు. భవిష్యత్తులో దేశంలోనే బంగారు ఉత్పత్తికి ఏపీ ప్రధాన చిరునామాగా మారుతుందని స్పష్టం చేశారు.
పుట్టపర్తి నుండి గగన గర్జన: AMCA ప్రాజెక్ట్ ప్రాధాన్యత
దేశం గర్వించదగ్గ వ్యూహాత్మక రక్షణ కేంద్రంగా పుట్టపర్తి అభివృద్ధి చెందబోతోందని సీఎం చంద్రబాబు అన్నారు. ఐదో తరం స్టెల్త్ ఫైటర్ జెట్లను తయారు చేసే ఏఎంసీఏ ప్రాజెక్టుతో ‘ఆత్మనిర్భర్ భారత్’ లక్ష్యాన్ని చేరుకోవడంలో ఏపీ కీలక పాత్ర పోషిస్తుందని చెప్పారు. రూ.15 వేల కోట్లకు పైగా పెట్టుబడితో ఈ ప్రాజెక్టు ద్వారా 7,500 మందికి ఉద్యోగావకాశాలు లభిస్తాయని వెల్లడించారు. కేవలం 36 రోజుల్లోనే అన్ని అనుమతులు ఇచ్చామని, ‘జెట్ స్పీడ్’తో ఈ ప్రాజెక్టుకు శంకుస్థాపన చేశారని గుర్తు చేశారు.
రక్షణ శక్తిగా ఆంధ్రప్రదేశ్: నాలుగు దిశల్లో వ్యూహాత్మక కేంద్రాలు
భౌగోళికంగా దేశ రక్షణకు ఏపీ అండగా నిలుస్తోందని చంద్రబాబు వివరించారు. ‘అంతరిక్ష శక్తి’గా శ్రీహరికోట, ‘క్షిపణి శక్తి’గా నాగాయలంక, ‘రక్షణ శక్తి’గా పుట్టపర్తి, ‘నావికా శక్తి’గా విశాఖపట్నం దేశానికి రక్షణ కవచంగా మారనున్నాయి. ఇటీవల యుద్ధాల్లో కీలకమైన డ్రోన్ టెక్నాలజీపై దృష్టి సారించామని, ఓర్వకల్లులో ‘డ్రోన్ సిటీ’ని ఏర్పాటు చేసి దేశానికే డ్రోన్ హబ్ గా తీర్చిదిద్దుతామన్నారు. ‘ఆపరేషన్ సింధూర్’లో ఉపయోగించిన డ్రోన్లను ఏపీలో తయారు చేసి పరీక్షించడం మనకు గర్వకారణమని అన్నారు.
రాయలసీమ: జెమ్స్ సీగా పునర్నిర్మించబడింది
కరువు ప్రాంతంగా మారిన రాయలసీమను మళ్లీ ‘రత్నాల మండలం’గా మారుస్తామని ముఖ్యమంత్రి హామీ ఇచ్చారు. సీమను లక్ష కోట్ల రూపాయలతో హార్టికల్చర్ హబ్గా మారుస్తున్నామని, 2027 డిసెంబర్ నాటికి కడప ఉక్కు కర్మాగారాన్ని పూర్తి చేస్తామని వెల్లడించారు.కియా పరిశ్రమ ఇప్పటికే 18 లక్షల కార్లను తయారు చేసి 80 దేశాలకు ఎగుమతి చేస్తోందని, అదే స్ఫూర్తితో కొప్పర్తిని ప్లాంట్ హబ్, ఎన్ఫీల్డ్తో ఎలక్ట్రానిక్స్ హబ్గా తీర్చిదిద్దుతామని వివరించారు.
అభివృద్ధిలో బుల్లెట్ వేగం: యువతకు పిలుపు
గత పాలనలో చేసిన విధ్వంసాన్ని ఎండగడుతూ కేవలం 23 నెలల్లోనే 23 లక్షల కోట్ల పెట్టుబడులు సాధించామని చంద్రబాబు అన్నారు. గూగుల్, ఆర్సెలార్ మిట్టల్ వంటి దిగ్గజ కంపెనీలు రాష్ట్రానికి రానున్నాయని, చిప్ నుంచి చిప్ వరకు ఏపీలోనే తయారు కావాలన్నదే తన ఆకాంక్ష అన్నారు. అభివృద్ధిని బుల్లెట్ స్పీడ్లో తీసుకువెళ్తున్నామని, యువత ఈ అవకాశాలను అందిపుచ్చుకోవాలని పిలుపునిచ్చారు.
పొదుపు ఉద్యమం: ‘నా దేశం – నా బాధ్యత’
ప్రధాని మోదీ పిలుపునిచ్చిన పొదుపు ఉద్యమానికి ఏపీ నాయకత్వం వహించాలని సీఎం కోరారు. ఇంధనం, బంగారం కొనుగోలు వల్ల విదేశీ మారకద్రవ్య నిల్వలు తగ్గుతున్నాయని, ప్రతి ఒక్కరూ బాధ్యతగా వ్యవహరించాలని సూచించారు. తన కాన్వాయ్లోని వాహనాల సంఖ్యను స్వయంగా తగ్గించి, ‘వర్క్ ఫ్రమ్ హోమ్’ వంటి ఏడు అంశాలను పాటించాలని ప్రజలకు విజ్ఞప్తి చేశారు.
రక్షణ మంత్రి రాజ్నాథ్ సింగ్ మాట్లాడుతూ..
చంద్రబాబు లాంటి దార్శనికత ఉన్న నేతను తన రాజకీయ జీవితంలో చూడలేదని రాజ్నాథ్ సింగ్ కొనియాడారు. ఏపీ అంటే ‘అధునాతన ప్రదేశ్’ అని, దేశానికే రోల్ మోడల్ అని కొనియాడారు. బెంగళూరు సమీపంలోని పుట్టపర్తి ప్రాంతాన్ని ‘మిలిటరీ ఇండస్ట్రియల్ కాంప్లెక్స్’గా మార్చాలని సీఎంను కోరారు. ఏఎంసీఏ తయారు చేసిన తొలి యుద్ధ విమానం పుట్టపర్తి నేల నుంచే టేకాఫ్ అవుతుందని స్పష్టం చేశారు. అలాగే భారత్ డైనమిక్స్ (బీడీఎల్) ఆధ్వర్యంలో నీటి అడుగున టార్పెడోల తయారీతో సముద్ర రక్షణ పటిష్టం కానుందన్నారు. గతంలో రూ.600 కోట్లుగా ఉన్న ఆయుధాల ఎగుమతులు రూ.40 వేల కోట్లకు చేరాయని, ఆయుధాల దిగుమతిదారు నుంచి ఎగుమతిదారుగా దేశం మారుతున్నదని రాజ్ నాథ్ సింగ్ వివరించారు.