అంతర్జాతీయ
-కొరివి జయకుమార్
నేపాల్ రాజకీయాలు తీవ్ర గందరగోళంలో ఉన్నాయి. ప్రధానమంత్రి బాలెన్ షా ప్రభుత్వం అధికారంలోకి వచ్చిన ఒక నెల లోపే హోం మంత్రి సుడాన్ గురుంగ్ రాజీనామా చేయడంతో సంక్షోభం మరింత తీవ్రమైంది. ఈరోజు (ఏప్రిల్ 22, 2026) ఆయన తన రాజీనామా లేఖను ప్రధాని బాలెన్ షాకు సమర్పించారు. ఈ పరిణామం ఇప్పుడు అంతర్జాతీయంగా చర్చనీయాంశంగా మారింది.
హోం మంత్రి గురుంగ్పై గత కొంత కాలంగా అవినీతి ఆరోపణలు వస్తున్నాయి. ప్రజా వ్యతిరేకత కూడా తీవ్రం కావడంతో ఆయన తన పదవికి రాజీనామా చేశారు. పాలనా పగ్గాలు చేపట్టిన స్వల్ప వ్యవధిలోనే కీలక మంత్రి పదవికి రాజీనామా చేయడం ప్రధాని బాలెన్ షా ప్రభుత్వానికి గట్టి ఎదురుదెబ్బగా మారింది.
గురుంగ్పై వచ్చిన ఆరోపణల్లో ముఖ్యంగా ఆదాయానికి మించిన ఆస్తులతో పాటు మనీలాండరింగ్కు సంబంధించినవి ప్రముఖమైనవి. వివాదాస్పద వ్యాపారవేత్త దీపక్ భట్టా తనకు చెందిన కంపెనీల్లో వాటాలు కొనుగోలు చేసినట్లు రుజువు కావడంతో ఆయన రాజీనామా చేశారు. మనీలాండరింగ్ కేసుల్లో భట్టా విచారణలో ఉన్నారు. తీవ్రమైన ఆరోపణల నేపథ్యంలో పూర్తి స్థాయి, నిష్పక్షపాత విచారణకు సహకరించే నైతిక బాధ్యతతో తన పదవికి రాజీనామా చేస్తున్నట్టు సుడాన్ గురుంగ్ సోషల్ మీడియా ద్వారా స్పష్టం చేశారు. ఈ ప్రకటన ఆయన రాజీనామా నిర్ణయానికి మరింత బలం చేకూర్చింది.
ప్రధాని బాలెన్ షా ప్రభుత్వం అధికారంలోకి వచ్చి నెల కూడా కాలేదు, దేశవ్యాప్తంగా నిరసనలు వెల్లువెత్తాయి. ఖాట్మండు సహా పలు ప్రధాన నగరాల్లో విద్యార్థులు, రాజకీయ పార్టీలు, సామాన్య ప్రజలు రోడ్లపైకి వచ్చి ధర్నాలు చేస్తున్నారు. ప్రభుత్వ నిర్ణయాలు సామాన్యులపై ఆర్థిక భారం మోపుతున్నాయని ఆందోళనకారులు ఆగ్రహం వ్యక్తం చేస్తున్నారు.
విశ్లేషకుల అభిప్రాయం ప్రకారం, ప్రస్తుత ప్రజల అసంతృప్తికి ప్రధాన కారణం భారత్తో సరిహద్దు నిబంధనలే. 100 నేపాలీ రూపాయలు (సుమారు ₹62) కంటే ఎక్కువ విలువైన భారతీయ వస్తువులపై కస్టమ్స్ సుంకం విధించడం ప్రజల ఆగ్రహానికి కారణమైంది. కొత్త నిబంధనల వల్ల భారత్పై నిత్యావసరాల కోసం ఆధారపడిన సరిహద్దు ప్రాంత ప్రజలకు నిత్యావసర వస్తువుల ధరలు భారీగా పెరిగాయి.
అవినీతి రహిత పాలన అందిస్తామన్న హామీతో అధికారంలోకి వచ్చిన ప్రధాని బాలెన్ షా అవినీతి ఆరోపణలతో తన కేబినెట్ మంత్రి రాజీనామా చేయడంతో తీవ్ర ఎదురుదెబ్బ తగిలింది. తన సొంత పార్టీలోనే విభేదాలు మరియు విస్తృత ప్రజా నిరసనల మధ్య బాలెన్ షా ప్రభుత్వం ఈ సంక్లిష్ట పరిస్థితులను ఎలా ఎదుర్కొంటుందో చూడాలి.