భారతదేశం
ఓయి-లింగారెడ్డి గజ్జల
తమిళనాడులో ఎన్నికలకు సమయం తక్కువగా ఉన్నప్పటికీ క్షేత్రస్థాయిలో రాజకీయ సమీకరణాలు వేగంగా మారుతున్నాయి. ఇటీవల ‘నక్కీరన్’ పత్రిక 119 నియోజకవర్గాల్లో నిర్వహించిన ఓట్ షేర్ సర్వే ఫలితాలను విడుదల చేసింది. ఈ గణాంకాలను విశ్లేషిస్తే.. ముఖ్యమంత్రి ఎంకే స్టాలిన్ నేతృత్వంలోని డీఎంకే+ కూటమి తిరుగులేని ఆధిక్యం దిశగా సాగుతున్నట్లు కనిపిస్తోంది. ముఖ్యంగా చెన్నై, తిరుచిరాపల్లి, తిరువళ్లూరు, వేలూరు వంటి కీలక ప్రాంతాల్లో డీఎంకే ప్రభావం స్పష్టంగా కనిపిస్తోంది.
నక్కీరన్ సర్వే చేసిన 119 నియోజకవర్గాల్లో డీఎంకే+ కూటమి దాదాపు 75 నుంచి 80 శాతం స్థానాల్లో ఆధిక్యంలో ఉంది. ముఖ్యంగా చెన్నై, తిరువళ్లూరు జిల్లాల్లో డీఎంకే క్లీన్ స్వీప్ దిశగా దూసుకుపోతోంది. ఇక్కడ దాదాపు అన్ని స్థానాల్లో డీఎంకే కూటమి ఓట్ల శాతం 45 శాతానికి పైగా ఉండటం గమనార్హం. గత ఎన్నికల్లో డీఎంకే తన పట్టును మరింత బలోపేతం చేసుకున్నట్లు సర్వే గణాంకాలు చెబుతున్నాయి.
విజయ్ ఎంట్రీ: విపక్షాలకు భారీ దెబ్బ?
తమిళ సూపర్ స్టార్ విజయ్ స్థాపించిన ‘తమిళగ వెట్రి కళగం’ (టీవీకే) ఈసారి ఎన్నికల్లో కీలక పాత్ర పోషించబోతోందని సర్వే వెల్లడించింది. టీవీకే పార్టీకి 7 శాతం నుంచి 15 శాతం ఓట్లు వస్తాయని అంచనా. అయితే, ఇక్కడో ఆసక్తికరమైన ట్విస్ట్ ఉంది. విజయ్ ఓట్లను చీల్చడం అధికార డీఎంకే కంటే ప్రత్యర్థి పార్టీలకే ఎక్కువ నష్టం కలిగించేలా కనిపిస్తోంది. విపక్షాల ఓట్లను చీల్చడం వల్ల డీఎంకే అభ్యర్థుల గెలుపు సులభమవుతుంది.
బహుముఖ పోటీలో డీఎంకేదే పైచేయి!
సర్వే ఫలితాల ప్రకారం, బహుముఖ పోటీ ఉన్న చోట, ప్రత్యర్థి ఓట్లు వివిధ పార్టీల (AIADMK, TVK, BJP) మధ్య చీలిపోయాయి. దీంతో డీఎంకే అభ్యర్థులు స్పష్టమైన మెజారిటీతో బరిలోకి దిగుతున్నారు. ముఖ్యంగా మెట్రో నగరాల్లో విపక్షాల కంటే డీఎంకేకే మద్దతు ఎక్కువ కావడం కూటమికి కలిసొచ్చే అంశం. ఇక విజయ్ పార్టీ బలపడడం డీఎంకేకు పరోక్షంగా మేలు చేస్తుందన్న విశ్లేషణలకు ఈ సర్వే బలం చేకూరుస్తోంది.
మొత్తానికి నక్కీరన్ సర్వే తమిళ రాజకీయాల్లో కొత్త చర్చకు తెరతీసింది. మరి దళపతి విజయ్ ఎంట్రీ స్టాలిన్ విజయయాత్రకు అడ్డుపడుతుందా లేక విపక్షాలను మరింత బలహీనపరుస్తుందా అనేది చూడాలి.