వినోదం
ఓయ్-కొరివి జయకుమార్
సూపర్ స్టార్ మహేష్ బాబు – దర్శకధీరుడు రాజమౌళి కాంబినేషన్ లో తెరకెక్కుతున్న చిత్రం “వారణాసి”. టాలీవుడ్ మోస్ట్ ప్రెస్టీజియస్ ఫిల్మ్ గా.. మహేష్ బాబు కెరీర్ లోనే అత్యంత భారీ బడ్జెట్ తో ఈ చిత్రాన్ని నిర్మిస్తున్నారు. మాలీవుడ్ స్టార్ పృథ్వీరాజ్ సుకుమారన్ కీలక పాత్రలో కనిపించనుండగా, ఈ సినిమాలో గ్లోబల్ బ్యూటీ ప్రియాంక చోప్రా హీరోయిన్ గా నటిస్తుంది. దుర్గా ఆర్ట్స్ క్రియేషన్స్ బ్యానర్పై కెఎల్ నారాయణ దాదాపు రూ.1200 కోట్ల భారీ బడ్జెట్తో నిర్మిస్తున్నారు. ఆస్కార్ అవార్డు గ్రహీత ఎంఎం కీరవాణి సంగీతం సమకూరుస్తున్నారు. ఈ సినిమా కోసం వీఎఫ్ఎక్స్ వర్క్ చేస్తున్న ఓ ఇంటర్నేషనల్ కంపెనీ తన వెబ్సైట్లో ఓ చిన్న కథను పోస్ట్ చేయగా ఇప్పుడు అది వైరల్గా మారింది.
ఇదీ కథ..
టైమ్ ట్రావెల్ నేపథ్యంలో ఈ సినిమా తెరకెక్కనుందని తెలుస్తోంది. లీక్ అయిన సమాచారం ప్రకారం ఈ సినిమాలో మహేష్ బాబు శివ భక్తుడిగా కనిపించనున్నారు. అపారమైన ఆధ్యాత్మిక శక్తులతో పాటు ప్రపంచాన్ని ప్రభావితం చేయగల అరుదైన ‘కాస్మిక్ ఆర్టిఫ్యాక్ట్’ కోసం అతని అన్వేషణ కథలో ప్రధానమైనది. మిస్సయిన ఆ విశ్వ కళాఖండాన్ని వెతుక్కుంటూ మహేష్ బాబు టైమ్ ట్రావెల్ చేస్తాడని అంటున్నారు. శతాబ్దాల నాటి నాగరికతలు, పురాతన దేవాలయాలు మరియు రహస్యాలు నిండిన ప్రదేశాలలో ఈ సాహసం జరగాలని భావిస్తున్నారు. ఎన్నో సవాళ్లను ఎదుర్కొంటూ తన మొత్తం ప్రయాణంలో దాగి ఉన్న రహస్యాలను ఎలా ఛేదించాడు అనేది సినిమా కథాంశం.
ఈ సినిమాలో విలన్గా నటిస్తున్న పృథ్వీరాజ్ సుకుమారన్ తన క్యారెక్టర్కి ‘కుంభ’ అని పేరు పెట్టినట్లు ఇప్పటికే తేలిపోయింది. అతను ప్రపంచాన్ని స్వాధీనం చేసుకోవాలని ఆశించే అత్యంత తెలివైన మరియు క్రూరమైన వ్యక్తిగా కనిపిస్తాడు. కథలో ప్రధాన సంఘర్షణ ఏమిటంటే, విశ్వ కళాఖండాన్ని సొంతం చేసుకోవడం మరియు ప్రపంచాన్ని ఎప్పటికీ తన నియంత్రణలో ఉంచుకోవడం అతని లక్ష్యం. ముఖ్యంగా ఐమాక్స్ ఫార్మాట్లో అత్యున్నత సాంకేతిక ప్రమాణాలతో సినిమా రూపొందుతోంది. విజువల్ ఎఫెక్ట్స్, గ్రాండ్ సెట్స్, ఇంటర్నేషనల్ లెవల్ యాక్షన్ సీక్వెన్స్ లతో ఈ సినిమా హాలీవుడ్ రేంజ్ లో ఉండబోతోందని సమాచారం.
షూటింగ్ – రిలీజ్ ప్లాన్..
ఇప్పటికే పృథ్వీరాజ్ తన పార్ట్ షూటింగ్ పూర్తి చేసుకున్నాడని సమాచారం. మిగిలిన షూటింగ్ని త్వరగా పూర్తి చేసి ఆగస్టు లేదా సెప్టెంబర్లోగా పూర్తి చేయాలని మేకర్స్ భావిస్తున్నారు. ఈ మూవీని ప్రపంచవ్యాప్తంగా ఏప్రిల్ 7, 2027న విడుదల చేసేందుకు ప్లాన్ చేస్తున్నారు. ఇటీవల హైదరాబాద్లోని రామోజీ ఫిల్మ్ సిటీలో ‘గ్లోబ్ ట్రాటర్’ అనే గ్రాండ్ ఈవెంట్ను ఏర్పాటు చేశారు. అందులో భాగంగానే ఈ సినిమా టైటిల్ను అధికారికంగా ప్రకటించి.. గ్లింప్స్ వీడియోను విడుదల చేశారు. మహేష్ బాబు ఫస్ట్ లుక్ కూడా విడుదలైంది. ఈ వీడియోలు సోషల్ మీడియాలో ఫుల్ ట్రెండ్ అవుతూ అంతర్జాతీయ స్థాయిలో సినిమాపై అంచనాలను పెంచేశాయి.