మన దేశ జనాభా ఎంతో తెలుసా? | జాతీయ జనాభా నివేదిక 2026: 2036 నాటికి 152 కోట్ల అంచనాలతో 142 కోట్ల మంది భారతీయులు మరియు విద్య ఖర్చు అంతర్దృష్టులు

భారతదేశం

ఓయి-లింగారెడ్డి గజ్జల

ప్రచురించబడింది: గురువారం, ఏప్రిల్ 30, 2026, 8:46 [IST]

ప్రస్తుతం దేశ జనాభా 142.58 కోట్లు కాగా అందులో పురుషులు 73.20 కోట్లు, మహిళలు 69.38 కోట్లు అని కేంద్ర గణాంక మంత్రిత్వ శాఖ నివేదిక వెల్లడించింది. 2036 నాటికి దేశ జనాభా మరో 10 కోట్లు పెరిగి 152.58 కోట్లకు చేరుకుంటుంది. అయితే, దేశంలో లింగ నిష్పత్తి మెరుగుపడడం సానుకూల పరిణామం. ప్రతి 1000 మంది అబ్బాయిలకు, బాలికల సంఖ్య 904 నుండి 917కి పెరిగింది. రాష్ట్రాల వారీగా, అరుణాచల్ ప్రదేశ్ (1085) అగ్రస్థానంలో ఉండగా, తెలంగాణ (906), ఆంధ్రప్రదేశ్ (931) జాతీయ సగటు కంటే వెనుకబడి ఉన్నాయి.

అక్షరాస్యత – జీవన ప్రమాణాలు

దేశ సగటు అక్షరాస్యత రేటు 77.7 శాతానికి చేరుకుంది. అక్షరాస్యత పెరగడంతో వివాహ వయస్సులోనూ మార్పు వస్తోంది. 2023 నాటికి, యువతుల సగటు వివాహ వయస్సు 22.4 సంవత్సరాలు. అలాగే భారతీయుల సగటు ఆయుర్దాయం పెరుగుతోంది; 2036 నాటికి, స్త్రీల సగటు వయస్సు 74.7 సంవత్సరాలకు మరియు పురుషులకు 71.2 సంవత్సరాలకు చేరుకుంటుందని అంచనా. కానీ శిశు మరణాల రేటు ఆంధ్రప్రదేశ్‌లో 22, తెలంగాణలో 20, మధ్యప్రదేశ్ (41) ఈ జాబితాలో అత్యంత వెనుకబడి ఉంది.

న్యాయవ్యవస్థ – రాజకీయాల్లో మహిళల వాటా..

కీలక నిర్ణయాలు తీసుకునే సంస్థల్లో మహిళా ప్రాతినిధ్యం ఇప్పటికీ ఆశాజనకంగా లేదు. సుప్రీంకోర్టు న్యాయమూర్తుల్లో 3.03% మాత్రమే మహిళలు ఉండగా, హైకోర్టులలో ఈ సంఖ్య 14.30%. రాజకీయాల్లోనూ ఇదే పరిస్థితి కనిపిస్తోంది. మహిళలు పార్లమెంటులో 13.65% మరియు కేంద్ర మంత్రివర్గంలో 9.86% మాత్రమే ప్రాతినిధ్యం వహిస్తున్నారు. స్థానిక సంస్థల్లో రిజర్వేషన్ల కారణంగా 49.75% మహిళా ప్రతినిధులు రావడం విశేషం. అయితే, 90% కుటుంబాల్లో ఇంటి విషయాల్లో మహిళల పాత్ర బలంగా ఉంది.

ఆరోగ్యం – శారీరక శ్రమ

ఊబకాయం పెద్ద ఆరోగ్య సమస్యగా మారుతోంది. 15-49 ఏళ్ల మధ్య వయసున్న మహిళల్లో ఊబకాయం 20% నుంచి 24%కి పెరిగింది. పొగాకు వాడకంలో తెలుగు రాష్ట్రాల్లో మగవారు (22% పైగా) ముందున్నారు. పనుల విభజనలో అసమానతలు ఇంకా కొనసాగుతున్నాయి. స్త్రీలు రోజుకు సగటున 289 నిమిషాలు ఇంటి పని కోసం వెచ్చిస్తారు, పురుషులు 88 నిమిషాలు మాత్రమే ఖర్చు చేస్తారు.

వేతన వ్యత్యాసం – విద్య ఖర్చులు

రోజువారీ వేతనాల్లో లింగ వివక్ష స్పష్టంగా కనిపిస్తోంది. కేరళలో పురుషులకు అత్యధికంగా రూ.970 వేతనం లభిస్తుండగా, మహిళలకు రూ.448 మాత్రమే లభిస్తోంది. పశ్చిమ బెంగాల్, హర్యానాలలో మహిళా కార్మికులకు మెరుగైన వేతనాలు లభిస్తున్నాయి. మరోవైపు చదువుకు అయ్యే ఖర్చు కూడా పెరుగుతోంది. పాఠశాల విద్య కోసం ఒక్కో విద్యార్థికి రూ.21,652 ఖర్చు చేస్తూ దేశంలోనే తెలంగాణ మూడో స్థానంలో ఉండగా, రూ.19,334తో ఆంధ్రప్రదేశ్ ఏడో స్థానంలో ఉంది. పట్టణ ప్రాంతాల్లో, తెలంగాణలో ఈ వ్యయం ఎక్కువగా ఉంది (రూ. 31,633).