ఆంధ్ర ప్రదేశ్
ఓయ్-చంద్రశేఖర్ రావు
ఎండలు మండిపోతున్న ప్రస్తుత పరిస్థితుల్లో చిరు జల్లులు, మోస్తరు వర్షాలు ఏపీని పలకరిస్తున్నాయి. బంగాళాఖాతంలో ఏర్పడిన ఉపరితల ఆవర్తనం ప్రభావంతో రాష్ట్రంలో భారీ వర్షాలు కురుస్తున్నాయి. ఉత్తరాంధ్ర మొదలుకొని రాయలసీమ వరకు చాలా చోట్ల ఆశించిన స్థాయిలో వర్షపాతం నమోదైంది. ఎండ వేడిమి నుంచి కాస్త ఉపశమనం కలిగించింది. మరోవైపు మెజారిటీ ప్రాంతాల్లో ఎండల తీవ్రత కొనసాగుతోంది.
రెండు రోజుల పాటు వర్షాల ప్రభావం కొనసాగనుంది. తెలంగాణ, రాయలసీమ, తమిళనాడు ప్రాంతాల మీదుగా మన్నార్ వరకు ఉపరితల ఆవర్తనం విస్తరించి ఉండడమే ఇందుకు కారణం. వీటి ప్రభావంతో నేడు శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, పోలవరం, విశాఖపట్నం జిల్లాల్లో ఓ మోస్తరు వర్షాలు కురుస్తాయని ఏపీ డిజాస్టర్ మేనేజ్మెంట్ ఆర్గనైజేషన్ మేనేజింగ్ డైరెక్టర్ ప్రఖర్ జైన్ తెలిపారు.
వీటితో పాటు అనకాపల్లి, కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు, కృష్ణా, ఎన్టీఆర్, గుంటూరు జిల్లాల్లో కొన్నిచోట్ల ఉరుములతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. అలాగే బాపట్ల, పల్నాడు, మార్కాపురం, ప్రకాశం, నెల్లూరు, చిత్తూరు, తిరుపతి జిల్లాల్లో అక్కడక్కడ ఉరుములతో కూడిన వర్షాలు పడే అవకాశం ఉంది.
ఆయా జిల్లాల్లో మరో రెండు రోజులు ఇదే పరిస్థితి కొనసాగనుంది. ఆకాశం మేఘావృతమై కనిపించవచ్చు. అక్కడక్కడ తేలికపాటి వర్షాలు పడే అవకాశం ఉంది. మంగళవారం సాయంత్రం 5 గంటల సమయానికి శ్రీకాకుళం జిల్లా కొర్లంలో అత్యధిక వర్షపాతం నమోదైంది. ఇక్కడ మేలో 59.5 మి.మీ వర్షం కురిసింది. ఏపీ విపత్తు నిర్వహణ సంస్థ తెలిపిన వివరాల ప్రకారం అనకాపల్లి జిల్లా బుచ్చయ్యపేటలో 55.2, రాజా 47, కే కోటపాడులో 21.2 మిల్లీమీటర్ల వర్షం కురిసింది.