అంతర్జాతీయ
ఓయ్-జక్కీ మహేష్
అమెరికా, ఇరాన్ల మధ్య నెలకొన్న ఉద్రిక్తతలు ఇప్పుడు ప్రపంచవ్యాప్తంగా అనేక ఇబ్బందులకు గురిచేస్తున్నాయి. ఇరు దేశాల మధ్య సయోధ్య కుదిర్చేందుకు పాక్ వేదికగా 21 గంటలపాటు జరిగిన చర్చలు ఎలాంటి ఫలితాన్ని ఇవ్వకపోవడంతో ఒక్కసారిగా పరిస్థితి మరింత దిగజారింది. ఈ వైఫల్యం తర్వాత అమెరికా అధ్యక్షుడు డొనాల్డ్ ట్రంప్ చాలా కఠిన నిర్ణయం తీసుకున్నారు. ఇరాన్ను ఆర్థికంగా, వ్యూహాత్మకంగా దెబ్బతీసేందుకు ఆ దేశంలోని ఓడరేవులకు వెళ్లే, వెళ్లే అన్ని రకాల నౌకలను అడ్డుకుని భారీ నౌకాదళ దిగ్బంధనం విధించాలని ఆదేశాలు జారీ చేశారు. భారత కాలమానం ప్రకారం ఈ రోజు సాయంత్రం నుంచి ఈ దిగ్బంధనం అమల్లోకి రానుండడంతో గల్ఫ్ ప్రాంతంలో యుద్ధ మేఘాలు కమ్ముకుంటున్నాయి.
ఇరాన్ను అడ్డుకోవాలని ట్రంప్ ఆదేశం.. హ్యాండ్ ఇచ్చిన మిత్రదేశాలు
అయితే, ఇరాన్ను ఒంటరి చేయాలనే ట్రంప్ వ్యూహానికి అమెరికా చిరకాల మిత్రదేశాల నుంచి ఊహించని ఎదురుదెబ్బ తగిలింది. అమెరికాకు అత్యంత సన్నిహితంగా ఉండే బ్రిటన్, ఆస్ట్రేలియాలు ఈ యుద్ధంలో పాల్గొనబోమని తేల్చిచెప్పాయి. బ్రిటన్ ప్రధాని కైర్ స్టార్మర్ ఈ అంశంపై తన వైఖరిని స్పష్టం చేశారు మరియు బ్రిటన్ అమెరికా నేతృత్వంలోని ఎటువంటి సైనిక కార్యకలాపాలలో పాల్గొనదని చెప్పారు. హార్ముజ్ జలసంధిని మూసివేయడం లేదా దిగ్బంధనం చేయడం వల్ల ప్రపంచవ్యాప్తంగా తీవ్రమైన ఇంధన సంక్షోభం ఏర్పడుతుందని, దీని వల్ల సామాన్య ప్రజలపై విద్యుత్, గ్యాస్ బిల్లుల భారం భారీగా పెరుగుతుందని ఆందోళన వ్యక్తం చేశారు. ‘ఇది మా యుద్ధం కాదు, మమ్మల్ని ఈ వివాదంలోకి లాగొద్దు’ అంటూ పరోక్షంగా ట్రంప్ కు గట్టి సంకేతాలు పంపారు.
సరైన నిర్ణయం కాదు: ఆస్ట్రేలియా ప్రధాని
మరోవైపు ఆస్ట్రేలియా కూడా అమెరికాకు సహకరించబోమని సూటిగా ప్రకటించింది. అంతర్జాతీయ సముద్ర చట్టాలను గౌరవించాల్సిన అవసరం ఉందని ఆస్ట్రేలియా ప్రధాని ఆంథోనీ అల్బనీస్ గుర్తు చేశారు. అదే సమయంలో, ఈ సంక్షోభంపై టర్కీ విదేశాంగ మంత్రి హకన్ ఫిదాన్ కూడా స్పందించారు. సైనిక చర్య ద్వారానే కాకుండా ఈ సమస్యకు శాశ్వత దౌత్యపరమైన పరిష్కారం కనుగొనాలని ఆయన సూచించారు. అమెరికా-ఇరాన్ చర్చలను పునఃప్రారంభించేందుకు వీలుగా ప్రస్తుత కాల్పుల విరమణను మరో 45 నుంచి 60 రోజుల పాటు పొడిగించాలని ఆయన ప్రతిపాదించారు.
అమెరికా సెంట్రల్ కమాండ్ సర్వం సిద్ధమైంది
మిత్రదేశాల నుండి మద్దతు లభించనప్పటికీ, అమెరికా సెంట్రల్ కమాండ్ (CENTCOM) తన వ్యూహాన్ని అమలు చేయడానికి పూర్తిగా సిద్ధంగా ఉంది. హార్ముజ్ జలసంధి గుండా వెళ్లే ఇరాన్ సంబంధిత నౌకలపై గట్టి నిఘా ఉంచుతామని.. నిషేధాన్ని అమలు చేస్తామని ప్రకటించింది. అయితే, ప్రస్తుతానికి ఇరాన్యేతర ఓడరేవుల మధ్య ప్రయాణించే నౌకలను మాత్రమే అనుమతిస్తామని స్పష్టం చేసింది. తన ప్రధాన మిత్రులు వెనక్కి తగ్గడంతో డొనాల్డ్ ట్రంప్ ఈ అంతర్జాతీయ సంక్షోభాన్ని, దిగ్బంధనాన్ని ఒంటిచేత్తో ఎలా ముందుకు తీసుకెళ్తారనేది ప్రపంచ దేశాల్లో ఆసక్తికర చర్చకు దారి తీస్తోంది.