అంతర్జాతీయ
ఓయ్-కొరివి జయకుమార్
జపాన్ ఉత్తర తీరంలో భారీ భూకంపం సంభవించింది. రిక్టర్ స్కేలుపై 7.4 తీవ్రతతో ఈ ప్రకంపనలు నమోదు కావడంతో ప్రజల్లో భయాందోళనలు నెలకొన్నాయి. సాన్రికు తీరానికి సమీపంలో సముద్ర ఉపరితలానికి 10 కిలోమీటర్ల లోతులో భూకంప కేంద్రం నమోదైనట్లు అధికారులు వెల్లడించారు.
ఈ భూకంపం ప్రభావంతో జపాన్ వాతావరణ సంస్థ వెంటనే అప్రమత్తమై సునామీ హెచ్చరికలు జారీ చేసింది. తీర ప్రాంతాల్లో మూడు మీటర్ల ఎత్తు వరకు అలలు ఎగసిపడే అవకాశం ఉందని, ప్రజలను సురక్షిత ప్రాంతాలకు తరలించాలని ఆదేశాలు జారీ చేశారు. తీర ప్రాంతాల్లో నివసించే ప్రజలు ఎత్తైన ప్రాంతాలకు వెళ్లాలని ఆదేశాలు జారీ చేసింది.
భూకంపం వచ్చిన వెంటనే కొన్ని ప్రాంతాల్లో చిన్నపాటి సునామీ అలలు నమోదయ్యాయని ప్రాథమిక సమాచారం. అయితే పెద్ద ఎత్తున నష్టం జరిగిందా అనే దానిపై అధికారులు సమగ్ర అంచనాలు వేస్తున్నారు. రైల్వే సర్వీసులను తాత్కాలికంగా నిలిపివేసి పలు ప్రాంతాల్లో విద్యుత్ సరఫరాకు అంతరాయం ఏర్పడింది.
మరోవైపు ప్రభుత్వం ఎమర్జెన్సీ రెస్పాన్స్ టీమ్లను రంగంలోకి దించింది. విపత్తు నిర్వహణ బృందాలు, అగ్నిమాపక సిబ్బంది, వైద్య బృందాలు అప్రమత్తంగా పని చేస్తూ పరిస్థితిని నిరంతరం పర్యవేక్షిస్తున్నారు. తీర ప్రాంతాల్లో సైరన్లు మోగించి ప్రజలను హెచ్చరిస్తున్నారు. పాఠశాలలు, కార్యాలయాలు తాత్కాలికంగా మూతపడ్డాయి.
జపాన్ భూకంపాలు ఎక్కువగా సంభవించే ప్రాంతాలలో ఒకటి కాబట్టి, అటువంటి విపత్తులను తట్టుకునేలా దాని మౌలిక సదుపాయాలు నిర్మించబడ్డాయి. అయినప్పటికీ, ఇంత పెద్ద భూకంపం సంభవించడం ప్రజలలో ఆందోళనను పెంచింది, మునుపటి 2011 టోహోకు భూకంపం మరియు సునామీని గుర్తుచేసుకుంది. పరిస్థితి అదుపులోనే ఉందని, అయితే అప్రమత్తంగా ఉండాలని అధికారులు చెబుతున్నారు. పరిస్థితిని క్షణక్షణం పర్యవేక్షిస్తున్నామని, అవసరమైన అన్ని చర్యలు తీసుకుంటున్నామని ప్రభుత్వం స్పష్టం చేసింది.