తెలంగాణ
ఓయ్-చంద్రశేఖర్ రావు
చార్మినార్ ఎక్స్ప్రెస్లో మంటలు చెలరేగాయి. ఈ ఘటన యాదాద్రి భువనగిరి జిల్లా ఆలేరు రైల్వేస్టేషన్ సమీపంలో చోటుచేసుకుంది. రైలు ఆలేరు స్టేషన్కు చేరుకునే సమయంలో ఎస్5 బోగీలో మంటలు చెలరేగాయి. తొలుత దట్టమైన పొగ అలుముకుంది. వెంటనే మంటలు చెలరేగాయి. క్షణాల్లో బోగీ మొత్తం వ్యాపించింది. మంటలను గుర్తించిన వెంటనే లోకో పైలట్లు రైలును నిలిపివేశారు.
ఈ ఘటనతో ప్రయాణికులు భయాందోళనకు గురయ్యారు. కొందరు బోగీ నుంచి కిందకు దూకారు. ప్రయాణికులంతా సురక్షితంగా బయటపడ్డారు. ఈ ఘటనలో ఎవరూ గాయపడలేదని, ప్రాణనష్టం జరగలేదని అందిన ప్రాథమిక సమాచారం మేరకు తెలుస్తోంది. ఈ అగ్నిప్రమాదంపై దక్షిణ మధ్య రైల్వే అధికారులు ఇంకా అధికారిక ప్రకటన చేయలేదు. అగ్ని ప్రమాదానికి గల కారణాలపై విచారణ కొనసాగుతోంది. షార్ట్ సర్క్యూట్ లేదా సాంకేతిక లోపమే కారణమని భావిస్తున్నారు.
సమాచారం అందుకున్న వెంటనే అగ్నిమాపక సిబ్బంది, పోలీసులు, రైల్వే సిబ్బంది సంఘటనా స్థలానికి చేరుకున్నారు. రైల్వే రెస్క్యూ టీం, ఇతర సహాయక బలగాలు పరిస్థితిని అదుపులోకి తెచ్చాయి. ఈ ప్రమాదానికి సంబంధించిన పలు వీడియోలు సోషల్ మీడియాలో వైరల్ అవుతున్నాయి. బోగీలోంచి పొగలు, మంటలు రావడాన్ని మీరు స్పష్టంగా చూడవచ్చు. అకస్మాత్తుగా మంటలు చెలరేగాయని, కోచ్ మొత్తం పొగతో నిండిపోయిందని ఓ ప్రయాణికుడు చెబుతున్నాడు. రైలు పూర్తిగా ఆగకముందే చాలా మంది దూకారని వివరించారు.