భారతదేశం
ఓయి-లింగారెడ్డి గజ్జల
2026 అసెంబ్లీ ఎన్నికల ఫలితాలు భారత జాతీయ కాంగ్రెస్ పార్టీకి చేదు జ్ఞాపకంగా మిగిలిపోయాయి. అసోం నుంచి తమిళనాడు, బెంగాల్ నుంచి కేరళ వరకు సాగిన ఈ ఎన్నికల ప్రచారంలో హస్తం పార్టీ ఉనికి ప్రశ్నార్థకంగా మారింది. ఒకప్పుడు దేశాన్ని ఏలిన పార్టీ ఇప్పుడు ప్రాంతీయ పార్టీల కనుసన్నల్లో లేక దాదాపు ఉనికిలో లేని స్థితిలో కొట్టుమిట్టాడుతోంది.
కాంగ్రెస్ ఆశలన్నీ కేరళపైనే పెట్టుకోగా, 30 స్థానాల్లో విజయం, మరో 30 స్థానాల్లో ఆధిక్యం ఆ పార్టీకి కాస్త ఊరటనిచ్చింది. కానీ జాతీయ స్థాయిలో పార్టీని నిలబెట్టేంత ఊపు లేదు. కేరళలో పినరయి విజయన్ ప్రభావాన్ని తగ్గించడంలో విజయం సాధించినా.. విజయం ఆ ఒక్క రాష్ట్రానికే పరిమితం కావడం పార్టీ శ్రేణుల్లో ఆందోళన కలిగిస్తోంది.
అసోంలో వారసత్వానికి షాక్.. గౌరవ్ గొగోయ్ ఘోర పరాజయం!
అస్సాంలో హిమంత బిస్వా శర్మ కంచుకోటను బద్దలు కొడతారని భావించిన కాంగ్రెస్కు ఓటర్లు షాక్ ఇచ్చారు. మాజీ సీఎం తరుణ్ గొగోయ్ వారసుడిగా, పీసీసీ అధ్యక్షుడిగా బాధ్యతలు చేపట్టిన గౌరవ్ గొగోయ్ జోర్హాట్ నుంచి 23 వేలకు పైగా ఓట్ల తేడాతో ఓడిపోయారు. ప్రియాంక గాంధీ స్వయంగా ప్రచారం నిర్వహించి టికెట్ల పంపిణీని పర్యవేక్షిస్తున్నప్పటికీ బీజేపీ జోరును మాత్రం ఆపలేకపోయింది. గత ఎన్నికలతో పోలిస్తే ఆ పార్టీ బలం కేవలం 20 సీట్లకే పరిమితమవడంతో అస్సాంలో కాంగ్రెస్ పతనం స్పష్టంగా కనిపిస్తోంది.
బెంగాల్లో మాయం.. తమిళనాడులో వెనుకబాటు!
పశ్చిమ బెంగాల్లో కాంగ్రెస్ పరిస్థితి మరీ దారుణంగా ఉంది. 294 సీట్లలో 2 మాత్రమే గెలుచుకుని 3.25 శాతం ఓట్లతో నామమాత్రపు పార్టీగా మిగిలిపోయింది. దీదీ వర్సెస్ మోదీ పోరులో కాంగ్రెస్ ప్రభావం పూర్తిగా తుడిచిపెట్టుకుపోయింది. ఇక తమిళనాడులో డీఎంకే వంటి బలమైన కూటమితోనూ కాంగ్రెస్ తన స్ట్రైక్ రేట్ను మెరుగుపరచుకోలేకపోయింది. 28 స్థానాల్లో పోటీ చేసి ఆరు స్థానాల్లో మాత్రమే పోటీ చేయడం వల్ల ఆ పార్టీ పొత్తుల వల్ల ప్రయోజనం పొందలేక పోతుందనేది వాస్తవం.
వ్యూహాత్మక వైఫల్యాలు.. నాయకత్వ లోపం!
ఎన్నికలకు ముందు సీనియర్ నేతలు బీజేపీలోకి వెళ్లిపోవడం, రాష్ట్ర స్థాయిలో బలమైన నాయకత్వం లేకపోవడం కాంగ్రెస్ ను దెబ్బతీసింది. అసోం వంటి రాష్ట్రాల్లో నాయకుల మధ్య సమన్వయం లేకపోవడం, కేవలం వారసత్వంపై ఆధారపడడం ఓటర్లను ఆకట్టుకోలేదని స్పష్టమవుతోంది. ఇలాగే కొనసాగితే ప్రాంతీయ పార్టీల ప్రాబల్యం పెరిగి జాతీయ స్థాయిలో కాంగ్రెస్ ఉనికి మరింత ప్రమాదంలో పడుతుందని రాజకీయ విశ్లేషకులు హెచ్చరిస్తున్నారు.