భారతదేశం
ఓయి-లింగారెడ్డి గజ్జల
దేశ రాజధాని శివార్లలోని నోయిడా పారిశ్రామిక ప్రాంతం సోమవారం ఒక్కసారిగా రణరంగంగా మారింది. తమ కష్టానికి తగిన ప్రతిఫలం, జీతాలు పెంచాలంటూ కార్మికులు చేపట్టిన నిరసన మూడో రోజు అదుపుతప్పి తీవ్ర ఘర్షణకు దారి తీసింది. శాంతియుతంగా ప్రారంభమైన ఆందోళన నిమిషాల వ్యవధిలోనే రాళ్లదాడి, వాహనాల దగ్ధంగా మారడంతో నోయిడా ఫేజ్-2 ప్రాంతం భీతావహ వాతావరణంలోకి దిగింది.
అసలు ఏం జరిగింది?
నోయిడా ఫేజ్-2లోని ఒక ప్రముఖ కంపెనీకి చెందిన వందలాది మంది ఉద్యోగులు మరియు కార్మికులు తమ పెండింగ్ జీతాల పెంపు డిమాండ్లను పరిష్కరించాలని డిమాండ్ చేస్తూ కంపెనీ గేట్ వద్ద గుమిగూడారు. గత కొంత కాలంగా యాజమాన్యం తమ గోడు వెళ్లబోసుకుంటున్నా పట్టించుకోవడం లేదు. చర్చలు విఫలమవడంతో ఆగ్రహంతో ఊగిపోయిన నిరసనకారులు విధ్వంసానికి దిగారు.
దహనం.. రాళ్ల వర్షం
కంపెనీ ఆవరణలోని వాహనాలపై ఆందోళనకారులు దాడికి పాల్పడ్డారు. పార్కింగ్లో ఉన్న కార్లు, బైక్లను ధ్వంసం చేయడమే కాకుండా కనీసం ఒక వాహనానికి నిప్పంటించడంతో ఆ ప్రాంతమంతా దట్టంగా పొగలు అలుముకున్నాయి. దారిలో వచ్చిన పోలీసులపై కార్మికులు రాళ్లు రువ్వారు. కంపెనీ కిటికీలు, అద్దాలు పగులగొట్టి బీభత్సం సృష్టించడంతో కంపెనీ ఉద్యోగులు ప్రాణభయంతో పరుగులు తీశారు.
#చూడండి | ఉత్తరప్రదేశ్: నోయిడాలోని ఫేజ్ 2లో వాహనాలు మరియు ఆస్తులను ధ్వంసం చేయడం మరియు రాళ్లతో దాడి చేయడం జరిగింది, అక్కడ పెద్ద సంఖ్యలో కంపెనీ ఉద్యోగులు తమ జీతాల పెంపు డిమాండ్పై నిరసనగా గుమిగూడారు. పరిస్థితిని అదుపులోకి తెచ్చేందుకు ఇక్కడ భారీగా పోలీసులు మోహరించారు. pic.twitter.com/1B0axJZSBN
– ANI (@ANI) ఏప్రిల్ 13, 2026
రంగంలోకి భారీగా బలగాలు
పరిస్థితి విషమించడంతో జిల్లా అధికారులు అప్రమత్తమయ్యారు. ఘటనా స్థలానికి వందలాది మంది పోలీసులు, ర్యాపిడ్ యాక్షన్ ఫోర్స్ను రప్పించారు. పోలీసులు లాఠీచార్జి చేసి ఆందోళనకారులను చెదరగొట్టేందుకు ప్రయత్నించారు. ప్రస్తుతం ఆ ప్రాంతమంతా పోలీసుల రక్షణలో ఉంది. ఎక్కడికక్కడ బారికేడ్లు ఏర్పాటు చేసి ఎవరూ గుమికూడకుండా ఆంక్షలు విధించారు.
ముందస్తు ప్రణాళిక?
ఒక చిన్న నిరసన ఇంత పెద్ద ఎత్తున హింసాత్మకంగా మారడం వెనుక ఏమైనా ముందస్తు ప్రణాళిక ఉందా? లేక సంఘ విద్రోహ శక్తులు అందులోకి ప్రవేశించాయా? అన్న కోణంలో పోలీసులు దర్యాప్తు చేస్తున్నారు. కార్మికులు ఇంత తీవ్ర నిర్ణయం తీసుకునే వరకు యాజమాన్యం ఎందుకు మౌనం వహించిందనేది ఇప్పుడు చర్చనీయాంశంగా మారింది.
ప్రస్తుతం నోయిడా ఫేజ్-2లో ఉద్రిక్తత కొనసాగుతోంది. పలువురు ఆందోళనకారులను పోలీసులు అరెస్టు చేశారు. ఈ ఘటనపై మరిన్ని వివరాలు తెలియాల్సి ఉంది.