ఫీచర్
ఓయి-లింగారెడ్డి గజ్జల
జీవితంలో శని ప్రభావం మొదలైందంటే చాలు.. ఒక్క అడుగు వేయాలంటేనే భయం. తమిళనాడులోని తిరుక్కోళికాడు ఆర్థిక ఇబ్బందులు, అనారోగ్యాలు, మానసిక ఆందోళనలతో బాధపడే భక్తులకు అభయమిచ్చే అద్భుత క్షేత్రం. ఇక్కడ కొలువై ఉన్న శనీశ్వరుడ్ని పూజిస్తే అన్ని కష్టాలు తొలగిపోయి ‘పొంగు’ (ఐశ్వర్యం) లభిస్తుందని భక్తుల ప్రగాఢ విశ్వాసం. అందుకే ఈ స్వామిని భక్తితో ‘పొంగు శని’ అంటారు.
సాధారణంగా శని మూడు దశల్లో వస్తుంది. మొదటి దశ (మంగు శని), ద్వితీయ దశ (పొంగు శని), తృతీయ దశ (మరణ శని). శనీశ్వరుడు రెండవ అతి ముఖ్యమైన దశలో భక్తులను కరుణించడానికి ఇక్కడ వేచి ఉన్నాడు. ఇది శని దేవాలయం మాత్రమే కాదు. ఇక్కడ శివుడు అగ్నిశ్వరార్ అని పిలుస్తారు. అగ్నిదేవుడు తన శాప విమోచనం కోసం ఇక్కడ తపస్సు చేసి శివుని అనుగ్రహాన్ని పొందాడని స్థలపురాణం చెబుతోంది.
శనికి ఈశ్వరుడు అనే పేరు ఎలా వచ్చింది?
భక్తులు భయపడి, అవమానించినందుకు చింతించిన శనిదేవుడు, వశిష్ట మహర్షి సలహా మేరకు ఇక్కడ శివుని కోసం ఘోర తపస్సు చేశాడు. శని భక్తికి మెచ్చిన భోళా శంకరుడు.. ‘నిన్ను దర్శించుకున్న భక్తులు కష్టాల నుంచి విముక్తి పొంది ధన్యులు అవుతారు’ అంటూ వరం ప్రసాదించాడు. అంతేకాదు తన పేరులోని ‘ఈశ్వరుడు’ అనే బిరుదును శనికి చేర్చుకున్నాడు. ఇక్కడ స్వామి తన వాహనం అయిన కాకి చేతిలో నాగలి పట్టుకుని రైతు రూపంలో దర్శనమివ్వడం మరో విశేషం.
ఆలయ ప్రత్యేకతలు.. అద్భుత దృశ్యాలు!
- అరుణవర్ణ లింగం: శివాలయాల్లోని లింగాలు సాధారణంగా నల్లగా ఉంటాయి. కానీ ఇక్కడ అగ్నిని సూచించే శివలింగం లేత ఎరుపు (అరుణ).
- నవగ్రహాల విచిత్రం: ఇతర ఆలయాలలో నవగ్రహాలు వివిధ దిశలలో ఉంటే, ఇక్కడ అన్ని గ్రహాలు ఒకదానికొకటి ఎదురుగా ఉండి భక్తులను అనుగ్రహిస్తాయి.
- ధనుర్బాణ సుబ్రహ్మణ్య: ఎక్కడా లేని విధంగా ధనుర్బాణాలు ధరించి యుద్దవీరుడిలా సుబ్రహ్మణ్యస్వామి ఇక్కడ కొలువై ఉన్నాడు.
- కుబేర స్థల ప్రభావం: ఇక్కడ కుబేరుడి స్థానంలో శనీశ్వరుడు ఉన్నాడని, ఈ స్వామిని దర్శించుకుంటే పోయిన సంపద తిరిగి వస్తుందని, వ్యాపారంలో అభివృద్ధి జరుగుతుందని భక్తుల నమ్మకం.
ఎలా వెళ్ళాలి?
ఈ ఆలయం తమిళనాడులోని తిరువారూర్ జిల్లాలో ఉంది. రైలులో వచ్చే వారు తిరువారూరు రైల్వేస్టేషన్లో దిగుతారు. ఆటో లేదా బస్సులో అరగంట ప్రయాణం చేస్తే ఆలయానికి చేరుకోవచ్చు. విమానంలో వచ్చే భక్తులు తిరుచిరాపల్లి (తిరుచ్చి) విమానాశ్రయంలో దిగి అక్కడి నుంచి ప్రైవేట్ వాహనాల్లో 100 కి.మీ దూరంలో ఉన్న తిరుక్కోళికాడుకు వెళ్లవచ్చు.
ముఖ్యంగా శనిత్రయోదశి, శివరాత్రి నాడు ఈ ఆలయానికి భక్తులు పోటెత్తారు. ఏలినాటి శని ప్రభావం ఉన్నవారు ఇక్కడి జమ్మిచెట్టుకు పూజలు నిర్వహించి బిల్వపత్రాలతో స్వామిని ప్రార్థిస్తే సకల దరిద్రాలు తొలగిపోయి అష్టైశ్వర్యాలు చేకూరుతాయని పురోహితులు చెబుతున్నారు.