అంతర్జాతీయ
-కొరివి జయకుమార్
ఇరాన్తో జరుగుతున్న చర్చలపై అమెరికా అధ్యక్షుడు డొనాల్డ్ ట్రంప్ మరోసారి తీవ్ర హెచ్చరికలు చేసి అంతర్జాతీయ రాజకీయాల్లో టెన్షన్ను పెంచారు. అరిజోనాలో జరిగిన ఓ కార్యక్రమంలో ఆయన మాట్లాడుతూ.. బుధవారం నాటికి ఇరాన్ తమతో ఒప్పందం కుదుర్చుకోవాలని స్పష్టం చేశారు. లేనిపక్షంలో మరోసారి బాంబు దాడులు చేస్తామని హెచ్చరించారు. ప్రస్తుత కాల్పుల విరమణ గడువు ఈ నెల 21తో ముగియనున్న నేపథ్యంలో ఈ వ్యాఖ్యలు మరింత ప్రాధాన్యతను సంతరించుకున్నాయి.
ట్రంప్ వ్యాఖ్యల ప్రకారం ఒప్పందం కుదరకపోతే కాల్పుల విరమణ పొడిగించే అవకాశాలు చాలా తక్కువగా ఉన్నాయి. ఇప్పటికే ఇరు దేశాలు చర్చల దిశగా అడుగులు వేస్తున్న నేపథ్యంలో.. ఇస్లామాబాద్ లో అమెరికా, ఇరాన్ ప్రతినిధుల మధ్య కీలక సమావేశం జరగనున్నట్టు సమాచారం. ఈ చర్చలు విఫలమైతే పశ్చిమాసియాలో మళ్లీ ఉద్రిక్త పరిస్థితులు తలెత్తే ప్రమాదం ఉందని హెచ్చరించారు.
మరోవైపు సముద్ర మార్గాలపై అమెరికా తన ఒత్తిడిని కొనసాగిస్తోంది. ముఖ్యంగా హార్ముజ్ జలసంధి గుండా ఇరాన్ నౌకల మార్గంపై తన దిగ్బంధనం కొనసాగుతుందని ట్రంప్ తెలిపారు. ప్రపంచ చమురు రవాణా కోసం ఈ కీలక మార్గంలో కొనసాగుతున్న ఉద్రిక్తతలు అంతర్జాతీయ మార్కెట్లను ప్రభావితం చేసే అవకాశం ఉంది.
అణు సమస్యపై కూడా ట్రంప్ కీలక ప్రకటన చేశారు. ఇరాన్లోని అణు కేంద్రాల వద్ద శుద్ధి చేసిన యురేనియంను భౌతికంగా వెలికితీసి అమెరికాకు పంపించే యోచనలో ఉన్నట్టు చెప్పారు. ఇందుకోసం భారీ యంత్రాలు అవసరమని వివరించారు. అంతేకాదు, అణ్వాయుధాలను వదులుకుంటామని ఇరాన్ తనకు హామీ ఇచ్చిందని ట్రంప్ పేర్కొన్నారు.
అయితే, టెహ్రాన్ ఈ వాదనలను తీవ్రంగా ఖండించింది. తమ వద్ద ఉన్న యురేనియం నిల్వలను ఎక్కడికీ తరలించబోమని ఇరాన్ విదేశాంగ శాఖ స్పష్టం చేసింది. ఈ వ్యాఖ్యలను ట్రంప్ కొట్టిపారేసినా.. మళ్లీ అదే వాదనను పునరుద్ఘాటించడం గమనార్హం. ఈ భిన్నాభిప్రాయాలు చర్చల భవిష్యత్తుపై అనుమానాలు కలిగిస్తున్నాయి.
నాటోను కూడా ట్రంప్ విమర్శించారు. గత ఉద్రిక్తతల సమయంలో నాటో సమర్థవంతంగా వ్యవహరించలేదని, వారి సహాయం తనకు అవసరం లేదని ఆయన స్పష్టం చేశారు. “మీకు ఇప్పుడు సహాయం కావాలా అని నాటో అడిగారు. కానీ రెండు నెలల క్రితం మీకు ఇది అవసరం” అని ఆయన వ్యాఖ్యానించారు. నాటోకు తమ అవసరం ఎక్కువగా ఉందని, అయితే వారికి నాటో అవసరం లేదని కూడా ఆయన పేర్కొన్నారు.