వినోదం
ఓయ్-కొరివి జయకుమార్
మెగాస్టార్ చిరంజీవి ప్రస్తుతం తన కెరీర్లో మరో గోల్డెన్ ఫేజ్ని ఎంజాయ్ చేస్తున్నారు. సంక్రాంతి కానుకగా విడుదలైన మన శంకర వరప్రసాద్ సినిమా బ్లాక్ బస్టర్ టాక్ తెచ్చుకుని గ్రాండ్ హిట్ అయ్యింది.
అనిల్ రావిపూడి దర్శకత్వం వహించిన ఈ చిత్రం మాస్ మరియు కుటుంబ ప్రేక్షకులను ఒకేలా ఆకట్టుకుంది మరియు చిరంజీవి కెరీర్లో మొదటిసారిగా రూ. 300 కోట్ల క్లబ్లోకి ప్రవేశించింది. “వింటేజ్ బాస్ ఈజ్ బ్యాక్” అంటూ అభిమానులు సంబరాలు చేసుకున్నారు. అయితే చిరు పొలిటికల్ ఎంట్రీకి ముందు టాలీవుడ్ నెంబర్ 1 హీరోగా కొనసాగాడు.
తెలుగులోనే కాకుండా ఇతర భాషల్లోనూ ఆయనకున్న క్రేజ్ గురించి కొత్తగా చెప్పాల్సిన పనిలేదు. తన సినీ కెరీర్లో ఎన్నో రికార్డులు కూడా సొంతం చేసుకున్నాడు. ఈ క్రమంలోనే ఓ దశలో ఇండియాలోనే అత్యధిక రెమ్యూనరేషన్ అందుకున్న హీరోగా కూడా నిలిచాడు. ఇప్పటి వరకు మెగాస్టార్ తీసుకున్నంత రెమ్యునరేషన్ ఏ సినిమాకి రాలేదు. మీ కోసం ప్రత్యేకంగా ఆ కథ ఏంటి..
ఏ సినిమా..
మెగాస్టార్ నటించిన “ఘరానా మొగుడు” సినిమా తెలుగు సినిమా చరిత్రలో ఒక గొప్ప మైలురాయిగా నిలిచింది. ఏప్రిల్ 9, 1992న విడుదలైన ఈ చిత్రం అప్పటి ఆంధ్రప్రదేశ్ బాక్సాఫీస్ రికార్డులను బద్దలు కొట్టి మాస్ ఎంటర్టైన్మెంట్కు కొత్త నిర్వచనం ఇచ్చింది. కె. రాఘవేంద్రరావు దర్శకత్వంలో ప్రముఖ నిర్మాత దేవి వర ప్రసాద్ నిర్మించిన ఈ సినిమా ఊహించని స్థాయిలో ప్రేక్షకులను ఆకట్టుకుంది. పూర్తి మాస్ ఎంటర్టైనర్గా రూపొందిన ఈ సినిమాలో చిరంజీవి స్టైల్, డ్యాన్స్, డైలాగ్ డెలివరీ ప్రేక్షకులను కట్టిపడేశాయి. మహిళా ప్రధానమైన కథలో, ఒక సామాన్య కార్మికురాలు తన ప్రతిభతో ఎదగడం, పెద్ద పారిశ్రామికవేత్తను సవాలు చేయడం వంటి అంశాలు అప్పటి ప్రేక్షకులకు కొత్త అనుభూతిని ఇచ్చాయి.
ఈ చిత్రంలో నగ్మా, వాణీ విశ్వనాథ్ కథానాయికలుగా నటించగా, రావుగోపాలరావు, కైకాల సత్యనారాయణ, బ్రహ్మానందం వంటి దిగ్గజాలు కీలక పాత్రలు పోషించారు. సంగీత దర్శకుడు ఎంఎం కీరవాణి పాటలు సినిమాకు ప్రాణం పోశాయి. ‘బంగారు కోడిపెట్ట’, ‘కిటుకులు దాననా’, ‘హే పిల్లా హల్లో పిల్లా’ వంటి పాటలు అప్పుడే కాదు ఇప్పటికీ ఆదరణ పొందుతున్నాయి. గీత రచయిత భువన చంద్ర సాహిత్యం చిరంజీవి డ్యాన్స్ మూవ్స్తో కలిపి, పాటలు ట్రెండ్సెట్టర్గా మారాయి.
బాక్సాఫీస్ వద్ద రికార్డుల వర్షం..
ఈ సినిమా విడుదలైన మొదటి రోజు నుంచే భారీ కలెక్షన్లను రాబట్టింది. 39 సెంటర్లలో 100 రోజులు, 3 సెంటర్లలో 175 రోజులు ప్రదర్శించి రికార్డులు సృష్టించింది. హైదరాబాద్లోని సంధ్య థియేటర్లో 183 రోజులు ఆడడం ఆ రోజుల్లో అరుదైన ఘనత. మొదటి వారంలో ₹1.35 కోట్ల షేర్, మొత్తం రన్లో ₹10 కోట్ల షేర్ రావడం అద్భుతం. దాదాపు ₹4 కోట్ల బడ్జెట్తో రూపొందిన ఈ చిత్రం ₹20 కోట్లకు పైగా వసూలు చేసింది. సౌత్ ఫిల్మ్ ఇండస్ట్రీలో ₹10 కోట్ల మార్క్ దాటిన మొదటి సినిమాగా ట్రేడ్ వర్గాల్లో సంచలనం సృష్టించింది.
మరోవైపు మలయాళంలో ‘హే హీరో’ పేరుతో విడుదలైన ఈ సినిమా అక్కడ కూడా మంచి విజయం సాధించింది. కేరళలో కూడా 175 రోజుల రన్ తో మంచి కలెక్షన్స్ రాబట్టింది. పాన్ ఇండియా లెవల్లో ఈ సినిమా ప్రభావం చూపిందనే చెప్పాలి. ఈ సినిమాతో చిరంజీవి స్టార్ డమ్ మరో స్థాయికి చేరుకుంది. ఈ చిత్రానికి గాను ₹1.25 కోట్ల రెమ్యునరేషన్ అందుకున్నాడు మరియు ఆ సమయంలో దేశంలోనే అత్యధిక పారితోషికం తీసుకున్న నటుడిగా చరిత్ర సృష్టించాడు.
అంతే కాకుండా ఇంటర్నేషనల్ ఫిల్మ్ ఫెస్టివల్ ఆఫ్ ఇండియాలో ఈ చిత్రాన్ని ప్రదర్శించడం మరో విశేషం. కమర్షియల్ సినిమా అయినప్పటికీ అంతర్జాతీయ స్థాయిలో తెరకెక్కడం ప్రత్యేక గుర్తింపు. ‘ఘరానా మొగుడు’ తర్వాత తెలుగు చిత్రసీమలో మాస్ సినిమాల ట్రెండ్ పూర్తిగా మారిపోయింది. హీరో ఎలివేషన్, డ్యాన్స్, పాటలకు ప్రాధాన్యత పెరిగిందని అంటున్నారు.